ఉత్తరరామాయణము - బ్రహ్మ యింద్రునితో గౌతముం డతని కిచ్చిన శాపకథఁ జెప్పుట - ఆంధ్రభారతి

బ్రహ్మ యింద్రునితో గౌతముం డతని కిచ్చిన శాపకథఁ జెప్పుట

శా.	నే నిర్మించిన కామినీమణులలో నీ టొందు నీలాలకన్‌ నే నింకొక్కరితన్‌ సృజింతు ననియున్‌ నిష్కర్షఁ గావించి యీ నానాదివ్య విశేష వస్తువుల సౌందర్యాంశముల్‌ గూర్చి లో కానందాకృతిగా సృజించితి నహల్యానామభామామణిన్‌	24
తే.గీ.	హలము నాఁగలిరూప మా హలము భావ మరయ హల్యంబు నాఁజను నట్టి హల్య మన్నెలంతకు లేమి నహల్యయనుచు నేను బలికితి నెఱుఁగవే యింద్ర! నీవు	25
సీ.	కమలవైఖరి సుధాకర కళావిభవంబు - లొకటియై చెలువొంది యుండుటకును భ్రమరసంపదలు సంపఁగె పువ్వు విలసనం - బొకటియై చెలువొంది యుండుటకును దాడిమీ బీజసంతతి శుకమణి ముఖం - బొకటియై చెలువొందియుండుటకును శంఖసౌభాగ్యంబుఁ జారు వీణాస్వనం - బొకటియై చెలువొంది యుండుటకును
గీ.	నేఁ బ్రయత్నంబు సేసి యన్నెలఁత కన్నుఁ గవ మొగము, చూపుగమి నాసికయు, రదములు మోవి, కంఠంబు సుస్వరమును - సృజించి కాంచితి సురేంద్ర! యఘటనాఘటన పటిమ	26
సీ.	పూర్ణేందుబింబ మెప్పుడు నిల్వలేదాయె - ననుదూఱు దీని యాననమువలనఁ గవ జక్కవలఁ బాయఁగాఁ జేసెనౌ నను - సడి దీని కుచలికుచముల వలనఁ బగలు కల్వల చెల్వుఁ బ్రబల నీ యండను - దూషణ దీని కందోయి వలన మించు నించుక సేపు మించి నిర్మింపతేఁ - డను రట్టు దీని దేహంబువలనఁ
గీ.	బాపుకొన లెస్స సృజియించె బ్రహ్మయనుచుఁ గొలువ వచ్చిన దేవతకోటి తలఁప నీ వెలఁది నిమ్మనుచు నన్ను నీవు వచ్చి వచ్చి యడుగుదు మఱచితే? వజ్రపాణి!	27
చం.	పలుమఱు నీవు వేఁడిన నభశ్చరు లెందఱు వచ్చివేఁడినన్‌ గలికి నొసంగ కెవ్వరికి గౌతమమౌనికి దాని నిచ్చినన్‌ గళవళ మంది నీవు రతికాంత కృతాంత లతాంతకుంతముల్‌ బలువిడి మానసాంబుజము బ్రద్దలు వాప నధైర్యమూర్తివై	28
కం.	నను దూఱుచు గౌతమముని వని దూఱుచుఁ గుసుమరచిత వల్లీవిలస ద్వనిఁదారుచు నచ్చెలిఁ బెనఁ గొనఁగోరుచుఁ బొంది ప్రొద్దుగ్రుంకినయంతన్‌	29
ఉ.	ఆ నడిరేయి కోడివలె నార్భటిసేసి మునీంద్రునిన్‌ నదీ స్నానము సేయఁబంచి కుహనామునివై చని గౌతమాంగనా నూన రతోత్సవాంబుధి మునుంగుచు నుండితి వంతలోన న మ్మౌనియు వచ్చి నిన్నుఁగని మచ్చర మల్కయు నిచ్చ హెచ్చఁగన్‌	30
మ.	కపటాకారముఁ బూని మౌనిసతులన్‌ గాంక్షించి యీలాగు గా ని పనుల్‌ సేయఁ గడంగినాఁడవె? బళా! నీ కండ గర్వంబు! దే వపతీ! శత్రుఁడు పట్టి కట్టికొనిపోవన్‌ దీఱుఁబొమ్మంచు నిన్‌ శపియించెంగద! నాఁటి శాపమిదిగో సంధిల్లె నీ నాఁటికిన్‌	31
కం.	నినుఁ గలిసిన నిజకాంతం బెను చట్టైయుండుమని శపించి జగతిఁ జ క్కని సతులు తఱుచుఁ గలిఁగెద రని ముని యనె నటుల నయిరి యది మొదలు సతుల్‌	32
వ.	కావున	33
చం.	వగవకు మీ యఘంబు చన వాసవ! వైష్ణవయాగ మంచితం బుగ నొనరింపు నీ యనుఁగుఁబుత్రుఁ బులోముఁడు వార్ధివైరిచే నగపడనీక దాఁచె వల దాతనికై వెతఁజెంద నంచు న న్నగరిపు నూరడించి నలినప్రభవుం డపుడేఁగె వీటికిన్‌	34
చం.	కమలజుఁ డానతిచ్చిన ప్రకారమునన్‌ గ్రతు వాచరించి ఖే ద ముడిగి వాసవుండు నిజధామముఁజేరె నృపాల! రావణ ప్రముఖులకంటె రావణి పరాక్రమ మెక్కువ యన్నమాట ని క్క మవుఁగదా యటం చల యగస్త్యమహాముని యాన తిచ్చినన్‌	35
తే.గీ.	ఆ పురావృత్తమున రావణాత్మజన్ము విక్రమము పెద్ద యనుమాట విని రఘుప్ర వీరుఁ డరుదందె సభనున్నవారలెల్ల నింద్రజిద్వైరి లక్ష్మణు నెంచి రపుడు	36
ఉ.	శ్రీరఘురాము చెంగట వసించి విభీషణుఁ డగ్రజక్రమం బా ఋషి దెల్పఁగా విని ప్రహర్షముతో నృపుఁ జూచి మున్ను క న్నారఁగ జూచినట్లు ముని యానతియియ్యఁగ నేఁడు వింటి న య్యారె! యగస్త్యుఁ డెంత మహిమాధికుఁ డంచు నుతించె నయ్యెడన్‌	37
కం.	మైత్రావరుణి ధరిత్రీ పుత్రీవరునిఁ గని యనియెఁ బుంభావకళా ధాత్రానందకరోక్తి సు గాత్రీపదపుటిత కటక ఘటితార్భటులన్‌	38
చం.	జడధిమదాంధకార హరశౌర్యదినేశ్వర! రామ! మున్ను నీ వడిగిన మాట కింక నొక యద్భుత మున్నది యాలకింపు మి వ్వడువున రావణుండు బలవంతుల మార్కొను వేడ్క నొక్కనాఁ డెడపక పశ్చిమాబ్ధి దరి కేఁగి తదంతికకాననంబునన్‌	39