ఆంధ్రభారతి - తాళ్లపాక అన్నమాచార్య కీర్తనలు - ఆతనిఁ బో పొగడేము ఆతని శరణంటిమి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 197-4
సంపుటము: 2-499

తాళ్లపాక అన్నమాచార్య

రాగము: రామక్రియ

ఆతనిఁ బో పొగడేము ఆతని శరణంటిమి ఆతఁడే సర్వజీవుల అంతర్యామి	॥పల్లవి॥
పెక్కు బ్రహ్మాండకోట్లు పెక్కు బ్రహ్మకోట్లు పెక్కు రుద్రకోట్లును పెక్కు యింద్రులు వొక్కొక్క రోమకూపాల నొగి నించుకుండునట్టి వొక్కఁడే విష్ణుఁడు వీఁడే వున్నతోన్నతుఁడు	॥ఆత॥
అనంత సూర్యచంద్రులు అనంత వాయువులును అనంత నక్షత్రము లనంత మేరువులు కొనలు సాగీ నన్నిటి కూటువఁ గూడుకొన్నట్టి అనంతుఁడొక్కఁడే మించీ నాదిమూరితి	॥ఆత॥
అసంఖ్యమహిమలను అసంఖ్యమాయలు అసంఖ్యశక్తులు వరాలసంఖ్యములు పొసఁగ నిన్నిటిఁ దానే పుట్టించి రక్షించినట్టి అసంఖ్యాతుఁడు శ్రీవేంకటాద్రీశుఁడు	॥ఆత॥