అధ్యాత్మ సంకీర్తన
రేకు: 206-3
సంపుటము: 3-33
రేకు: 206-3
సంపుటము: 3-33
తాళ్లపాక అన్నమాచార్య
రాగము: గుండక్రియ
| ఇట్టి నాస్తికుల మాట యేమని నమ్మెడి దిఁక పట్టి సములమంటానే భక్తుల దూషింతురు | ॥పల్లవి॥ |
| వేదములు చదువుతా విశ్వమెల్లాఁ గల్లనేరు ఆ దెస తాము పుట్టుండి అదియును మాయనేరు పాదగు విష్ణుడుండఁగ బయలు తత్త్వమనేరు లేదు జీవత్వమంటా లేమలఁ బొందుదురు | ॥ఇట్టి॥ |
| తిరమై తమ‌ఇండ్ల దేవపూజలు సేసేరు ధరలోన తముఁ దామే దైవమనేరు అరయఁ గర్మమె బ్రహ్మమని యాచరించేరు సరి నదే కాదని సన్యసించేరు | ॥ఇట్టి॥ |
| అందుక పురుషసూక్త మర్థముఁ జెప్పుదురు కందువ నప్పటి నిరాకార మందురు యిందులో శ్రీవేంకటేశ యిటె నీ దాసులుఁ గాక మందపు రాక్షసులాడే మతము నడతురు | ॥ఇట్టి॥ |