ఆంధ్రభారతి - తాళ్లపాక అన్నమాచార్య కీర్తనలు - వేఱొకచోట లేఁడు వీఁడివో హరి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 210-3
సంపుటము: 3-57

తాళ్లపాక అన్నమాచార్య

రాగము: లలిత

వేఱొకచోట లేఁడు వీఁడివో హరి వీఱిడియై చేరువనే వీఁడివో హరి	॥పల్లవి॥
మునుకొని వెదకితే ముక్కునూర్పు గాలికొన వెనవెనకఁ దిరిగీ వీఁడివో హరి పెనఁగి వెదకఁబోతే పెడచెవుల మంత్రమై వినవచ్చీ మాటలలో వీఁడివో హరి	॥వేఱొ॥
సోదించి వెదకితేను చూపులకొనలనే వీదుల నెందు చూచినా వీఁడివో హరి అదిగొని వెదకితే నట్టే నాలికకొన వేదమై నిలిచినాఁడు వీఁడివో హరి	॥వేఱొ॥
తెలిసి వెదకఁబోతే దేహపు టంతరాత్మయై వెలుపలా లోపలాను వీఁడివో హరి చెలఁగి శ్రీవేంకటాద్రిఁ జేకొని మమ్ము రక్షించ వెలసె నిందరుఁ జూడ వీఁడివో హరి	॥వేఱొ॥