ఆంధ్రభారతి - తాళ్లపాక అన్నమాచార్య కీర్తనలు - ఆతఁడు భక్తసులభుఁ డచ్యుతుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 218-4
సంపుటము: 3-99

తాళ్లపాక అన్నమాచార్య

రాగము: భైరవి

ఆతఁడు భక్తసులభుఁ డచ్యుతుఁడు రాతిగుండెవాఁడుగాఁడు రంతు మానుఁ డిఁకను	॥పల్లవి॥
జీవుఁడా వేసరకు చిత్తమా జడియకు దైవము గరుణించఁ దడవు గాదు తోవ చూపె మనకు తొల్లే ఆచార్యుఁడు కావలసినట్లయ్యీఁ గలఁగకుఁ డిఁకను	॥ఆతఁ॥
కాలమా వేగిరంచకు కర్మమా నన్నుమీరకు పాలించ దైవానకు నే భార మిఁకను ఆలించి తిరుమంత్రమే ఆతని నన్నుఁ గూరిచె వేళగాని‌ అందాఁకా వేసరకుఁ డిఁకను	॥ఆతఁ॥
వెఱవకు దేహమా వేసరకు ధ్యానమా యెఱిఁగి శ్రీవేంకటేశుఁ డెడసిపోఁడు తఱి నిహపరము లితనిదాసు లిచ్చిరి గుఱియైతి నిన్నిటికిఁ గొంకకుఁడీ ఇఁకను	॥ఆతఁ॥