ఆంధ్రభారతి - తాళ్లపాక అన్నమాచార్య కీర్తనలు - పరమయోగీశ్వరుల పద్ధతి యిది - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 237-3
సంపుటము: 3-212

తాళ్లపాక అన్నమాచార్య

రాగము: భూపాళం

పరమయోగీశ్వరుల పద్ధతి యిది ధరణిలో వివేకులు దలపోసుకొనుట	॥పల్లవి॥
మొదల నాత్మజ్ఞానము దెలిసి పిమ్మట హృదయములోని హరి నెరుఁగుట వుదుటైన యింద్రియాల నొడిసి పంచుకొనుట గుదిగొన్నతనలో కోరికె లుడుగుట	॥పర॥
తన పుణ్యఫలములు దైవము కొసగుట పనివడి యతనిపై భక్తిచేసుట తనివితో నిరంతర ధ్యానయోగపరుఁడౌట మనసులోఁ బ్రకృతిసమ్మంధము మరచుట	॥పర॥
నడుమ నడుమ విజ్ఞానపు కథలు వినుట చిడుముడి నాచార్యసేవసేయుట యెడయక శ్రీవేంకటేశుపై భారమువేసి కడు వైష్ణవుల కృప గలిగి సుఖించుట	॥పర॥