ఆంధ్రభారతి - తాళ్లపాక అన్నమాచార్య కీర్తనలు - తప్పించుకోరా దిఁక దైవమే గతి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 238-3
సంపుటము: 3-218

తాళ్లపాక అన్నమాచార్య

రాగము: ధన్నాసి

తప్పించుకోరా దిఁక దైవమే గతి యెప్పుడు నుద్ధరించేవా రెవ్వరును లేరు	॥పల్లవి॥
మలసి దేహానందమే మరిగిన యాత్మకు తొలుత బ్రహ్మానందము దొరకదు అలవాటై క్షుద్రభోగాలందుఁ జిక్కిన యాత్మకు బలిమి విరతిఁ బొంద బలపడదు	॥తప్పిం॥
సర్వదా బ్రహ్మాండములోఁ జరియించే యాత్మకు నిర్వహించి వెడలఁగ నేరుపు లేదు వుర్వి లోపలి చింతలుడుగని యాత్మకు నిర్వికారభావము నెలకొనదు	॥తప్పిం॥
విరసవర్తనలనే వెలసేటి యాత్మకు పరగఁ బేదలమీఁది భక్తి పుట్టదు ధరలో శ్రీవేంకటేశుదాసుఁడుగాని యాత్మకు వెర పేమిటా లేదు వెదకి చూచినను	॥తప్పిం॥