ఆంధ్రభారతి - తాళ్లపాక అన్నమాచార్య కీర్తనలు - కన్నదేఁటిదో విన్నదేఁటిదో కాఁగలదిఁక నేదో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 255-5
సంపుటము: 3-318

తాళ్లపాక అన్నమాచార్య

రాగము: బౌళి

కన్నదేఁటిదో విన్నదేఁటిదో కాఁగలదిఁక నేదో నన్నుం గానను నిన్నుం గానను నడుము బట్టబయలు	॥పల్లవి॥
నీమాయమహిమో నే నేరని కడమో భూమిలోన నీవున్నాఁడవు నా పుట్టుగులుఁ గలవు యేమి గాఁగలనో యింకా మీఁదట నిటకతొల్లి యేమైతినో సోమార్కుల వుదయాస్తమయంబులు చూచుచునున్నాఁడను నేను	॥కన్న॥
జ్ఞానము నీవో అజ్ఞానంబే బలువో నీనామంబులు అనంతకోట్లు నిలుకడగాఁ గాను కానఁగల యీ ప్రపంచమెల్లా కలయో యిది నిజమో కానరాని యీ ముక్కున నూర్పులు కాలముఁ గొలచేటి కుంచములు	॥కన్న॥
నీకు నీవే నను దయ దలఁచితివో నేనాచార్యుని నమ్మితినో కైకొని నాయంతర్యామివి నినుఁ గంటినిపుడే నేను శ్రీకాంతుఁడవో శ్రీవేంకటేశ్వర శ్రీవైకుంఠమే యీజగము యేకడ చూచిన నీదాసులు నాయెదుటనే వున్నారు	॥కన్న॥