ఆంధ్రభారతి - తాళ్లపాక అన్నమాచార్య కీర్తనలు - చెల్లునమ్మా ఆతనికి సేసేటి చేఁతలెల్లా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1910-1
సంపుటము: 29-55

తాళ్లపాక అన్నమాచార్య

రాగము: గౌళ

చెల్లునమ్మా ఆతనికి సేసేటి చేఁతలెల్లా కొల్లున నవ్వెఁ గదమ్మా గోవిందదేవుఁడు	॥పల్లవి॥
వీడెపుఁ బెదవులతో వినోదా లాడుకొంటా వాడ వనితలనెల్లా వావు లడిగీ వాడికలు సేసుకొని వలపులు పైఁ జల్లీ కోడెకాఁడు గదవమ్మా గోవిందదేవుఁడు	॥చెల్లు॥
దంటమాఁటలెల్లా నాడి తమిరేఁచుకొంటాను సొంటులు సోదించీఁ దాను సుదతులను అంటిముట్టి చనుఁగవలందు గురుతులునించీ గొంటరివాఁడు గదమ్మా గోవిందదేవుఁడు	॥చెల్లు॥
వల్లెవాటుఁ బయ్యెదతో వరుసలు బెట్టుకొంటా చల్లనికాఁగిటఁ గూడీ సతులనెల్లా తెల్లమి శ్రీవేంకటాద్రిఁ దిరుపతిలో నున్నాఁడు కొల్లకాఁడు గదవమ్మా గోవిందదేవుఁడు	॥చెల్లు॥