ఆంధ్రభారతి - తాళ్లపాక అన్నమాచార్య కీర్తనలు - ఊరకున్నాఁ బోనీదు వుడివోని జవ్వనము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1929-2
సంపుటము: 29-110

తాళ్లపాక అన్నమాచార్య

రాగము: పాడి

ఊరకున్నాఁ బోనీదు వుడివోని జవ్వనము తారుకాణ లివి నీకు దాఁగవచ్చునటరే	॥పల్లవి॥
కనుచూపులు సోఁకితే కలయికలు రేఁచును మనసు లెనసితేను మర్మము లంటు చెనకులు వేడుకైతే సేసిన చేఁతలు చెల్లు పెనచితే నొందొకటి పెనులంకెలే	॥ఊర॥
యెడమాఁటలు వింటేనే హెచ్చుఁ దరితీపులు బడివాయకుండితేఁ జొప్పఁడు జెలిమి వొడఁబాటు గలిగితే నొనగూడుఁ గాఁగిళ్ళు తడయ కొండొకటికిఁ దగులాయమే	॥ఊర॥
నవ్వులకు లోనైతే నాము లెక్కు వలపులు వువ్విళ్ళూరఁ బెనఁగితే నుబ్బించు మేను ఇవ్వల శ్రీవేంకటేశుఁ డిన్నిటాను నిన్ను నేలె నివ్వటిల్ల నొండొంటితో నెరవైన జంటలే	॥ఊర॥