ఆంధ్రభారతి - తాళ్లపాక అన్నమాచార్య కీర్తనలు - చాటి చెప్పితి మిపుడే సంతమౌటే మేలు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1933-4
సంపుటము: 29-136

తాళ్లపాక అన్నమాచార్య

రాగము: పాడి

చాటి చెప్పితి మిపుడే సంతమౌటే మేలు వాటముగఁ జెలిమి మఱవకుమయ్యా యిఁకను	॥పల్లవి॥
సుదతి కనుచూపులకు సొరిది నొడ్డుకోరాదు అదరు వెన్నెలనవ్వు కడ్డము లేదు తుద బొమ్మజంకెనలు తొలఁగ దొబ్బఁగరాదు ముదురు వలపులు మిగుల ముంచుకొనునపుడు	॥చాటి॥
కొనగోరివాఁడి మరి గురిదప్పుకొనరాదు చెనకుఁ జేఁతుల కోరసేయరాదు మనసు కరఁగింపులకు మరఁగువెట్టఁగరాదు తనివోని కోరికలు తగులుకొనునపుడు	॥చాటి॥
వలుద చనుగుబ్బలకు వడి మాటుకొనరాదు కలయుకాఁగిటికి తెరఁగట్టరాదు యెలమి శ్రీవేంకటేశ ఇపు డీకెఁ గూడితివి కలుగుఁ దమకము లిట్లఁ గరుణించినపుడు	॥చాటి॥