శృంగార సంకీర్తన
రేకు: 1935-5
సంపుటము: 29-149
రేకు: 1935-5
సంపుటము: 29-149
తాళ్లపాక అన్నమాచార్య
రాగము: గౌళ
| కాంతపై మిక్కిలి బత్తిగలిగిన చెలులాల పొంత నీపె వేడుకలు పొసఁగఁగజేయరే | ॥పల్లవి॥ |
| వనములో కోవిలల వట్టి రట్టు సేయనేల పెనఁగి తుమ్మిదల కోపించఁగనేల పనివడి చందురునిపై నేరమెంచనేల వినయాన విభునికే విన్నపము సేయరే | ॥కాంత॥ |
| గూటిలోని చిలుకలఁ గొసరి జంకించనేల నీటునఁ జల్లగాలిని నిందించనేల పాటించి వసంతునితో పంతాలు దూయనేల మాటలాడి విభుని నెమ్మదిని రప్పించరే | ॥కాంత॥ |
| పంచనున్న పావురాల బదరి తిట్టఁగనేల పంచసాయకుని నొడఁబరచనేల యెంచఁగ శ్రీవేంకటేశుఁ డిదె వచ్చి యింతిఁ గూడె మంచివాయఁ బనులెల్లా మనవులు చెప్పరే | ॥కాంత॥ |