ఆంధ్రభారతి - తాళ్లపాక అన్నమాచార్య కీర్తనలు - అక్కచెల్లెండ్లము నేము ఆకె నాకు వింతగాదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1941-2
సంపుటము: 29-182

తాళ్లపాక అన్నమాచార్య

రాగము: శుద్ధవసంతం

అక్కచెల్లెండ్లము నేము ఆకె నాకు వింతగాదు చక్కఁగా మాఁటలాడరే సంతోసించుకొంటాను	॥పల్లవి॥
చెప్పరే మీ రితనికి చెలియ సుద్దు లెల్లాను విప్పుచుఁ జెవులు చల్లఁగా వినీఁగాక యిప్పు డిట్టె నేనుండఁగా నేల దాఁచే రాపనులు చొప్పుగా మొక మొకాలు చూచుకొంటాను	॥అక్క॥
మొక్కరే మీ రితనికి మోహపు దేవుల మారు చొక్కుచుఁ గన్నులారాఁ జూచి యేల యిక్కడ నన్నుఁ జూచి వూరకున్నవాఁడు చెక్కుల చేతులతోడ చేరి నవ్వుకొంటాను	॥అక్క॥
యియ్యరే కానుక లాపె యిచ్చి పంపినవెల్లా చెయ్యారా నందుకొని చెలఁగుఁగాని యియ్యెడ శ్రీవేంకటేశుఁ డేలినాఁడు నన్ను నిట్టె వొయ్యనే మీరేల లోఁగే రూహించుకొంటాను	॥అక్క॥