ఆంధ్రభారతి - తాళ్లపాక అన్నమాచార్య కీర్తనలు - మీరేమి బుద్ధిచెప్పేరే మెలుఁతలాలా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1941-5
సంపుటము: 29-185

తాళ్లపాక అన్నమాచార్య

రాగము: మధ్యమావతి

మీరేమి బుద్ధిచెప్పేరే మెలుఁతలాలా నా రమణుని గుణాలు నాకే తెలుసును	॥పల్లవి॥
సంతోసాన నుండి సరసములాడవచ్చుఁగాక పంతములాడవచ్చుగా పతితోను దొంతర రతుల గూడి తులఁదూఁగవచ్చుఁగాక వింత వింత కపటాల విఱ్ఱవీఁగవచ్చునా	॥మీరే॥
చొక్కముగా సేవసేసి సొలయఁగవచ్చుఁగాక కక్కసించవచ్చునా కాంతునితోను చెక్కునొక్కి చనవునఁ జెనకఁగవచ్చుఁగాక పెక్కులాగుల జంకించి పెనఁగఁగవచ్చునా	॥మీరే॥
కూరిమితో నవ్వు నవ్వి కొసరఁగవచ్చుఁగాక బీరమాడవచ్చునా ప్రియునితోను యీరీతి శ్రీవేంకటేశుఁ డీతఁడే నన్ను నేలె దారకపు చేఁతలను తప్పులెంచవచ్చునా	॥మీరే॥