ఆంధ్రభారతి - తాళ్లపాక అన్నమాచార్య కీర్తనలు - విన్నపము సేయవమ్మా విభునికి సుద్దులు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1946-3
సంపుటము: 29-213

తాళ్లపాక అన్నమాచార్య

రాగము: దేశాక్షి

విన్నపము సేయవమ్మా విభునికి సుద్దులు చెన్నుగా నేమి సేతము చెప్పరమ్మా బుద్దులు	॥పల్లవి॥
యెనలేని వలపుల యీఁతలు మునుకొన్న నిట్టూర్పుల మోఁతలు పొనుగొని సిగ్గుల పూఁతలు వనితకు మరుఁడు సేసిన చేఁతులు	॥విన్న॥
కలసేటి తమకపు కరఁగులు మలయుఁ జెక్కిటి చేయి మఱఁగులు సెలసి పయ్యెదజారు చెఱఁగలు చెలియకే మరుఁడుసేసిన తెఱఁగులు	॥విన్న॥
మరిగిన విరహపు మందులు వెను కొన్నభావరతి విందులు యిరవై, శ్రీవేంకటేశుఁ డిందులోనె వచ్చి కూడె తరుణి కింతసేసిన తగు పొందులు	॥విన్న॥