ఆంధ్రభారతి - తాళ్లపాక అన్నమాచార్య కీర్తనలు - ఇట్టె కరుణించవద్దా యింతటనైనా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1951-5
సంపుటము: 29-245

తాళ్లపాక అన్నమాచార్య

రాగము: ఆహిరి

ఇట్టె కరుణించవద్దా యింతటనైనా నెట్టుకొన్న వినయాన నెలకొన్నదానను	॥పల్లవి॥
మునుకొని చేతులెత్తి మొక్కితి నప్పుడె నీకు చనుఁగవ యే లంటేవు సారెకునని ననిచి పెట్టరానియానలెల్లా నీకుఁ బెట్టితి గానకొని చెక్కులపై గోర గీరకుమని	॥ఇట్టె॥
లలి మోవి తేనియాలు లంచము లిచ్చితి నీకు తిలకించి మానముపైఁ దిట్టకుమని పిలిచినా చిలుక నీ పేరువెట్టి వేఁడుకొంటి యెలమి నా సిగ్గులు బాయిట వేయకుమని	॥ఇట్టె॥
కదిసి వినయముతోఁ గాఁగిలించుకొంటి నిన్ను పదరి యెన్నఁడూ నన్నుఁ బాయకుమని యిదె శ్రీవేంకటేశ న న్నేలినందుకు మెచ్చితి సదరాన నీవే భువి జాణఁడవని	॥ఇట్టె॥