ఆంధ్రభారతి - తాళ్లపాక అన్నమాచార్య కీర్తనలు - ఇటువంటి సతి పొందు లెంతని పొగడవచ్చు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1956-5
సంపుటము: 29-275

తాళ్లపాక అన్నమాచార్య

రాగము: మాళవిగౌళ

ఇటువంటి సతి పొందు లెంతని పొగడవచ్చు తటుకన నీకు నబ్బెఁ దగు మీ యిద్దరికి	॥పల్లవి॥
చిందేటి పెదవి తేనె చిప్పిలఁగాఁ జెలి నీతో మందలించి నోరు నిండా మాఁటలాడెను చందమామవంటి మోము చక్క నెత్తి వేడుకతో కందువ నీ ముందరను కలకల నవ్వెను	॥ఇటు॥
జారిన పయ్యదలోని చనుఁగవ గానరాఁగా గారవముతోడ నీకుఁ గాను కిచ్చెను బారెఁడేసి నెరిఁగొప్పుపాదాలపై సోఁకఁగాను కూరిమితో నీకు నిట్టె గురుతుగా మొక్కెను	॥ఇటు॥
బంగారువంటి చేతులఁ బట్టి నీ చెక్కులు నొక్కి చెంగలించి విడెము నీ చేతి కిచ్చెను అంగపుఁజెమటతో ని న్నలమి శ్రీవేంకటేశ వుంగిటిగా రతుల ని న్నోలలాడఁజేసెను	॥ఇటు॥