ఆంధ్రభారతి - తాళ్లపాక అన్నమాచార్య కీర్తనలు - ఈ కాంత నేలిన యీతఁ డెంత భాగ్యవంతుఁడే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1956-6
సంపుటము: 29-276

తాళ్లపాక అన్నమాచార్య

రాగము: కాంబోది

ఈ కాంత నేలిన యీతఁ డెంత భాగ్యవంతుఁడే చేకొన్న సంతోసాన చెలరేఁగీ వీఁడివో	॥పల్లవి॥
కలికి కన్నుల చూపు కమ్మమోవి తరితీపు చెలియ చక్కని రూపు చెప్పఁ గొత్తలు మొలక చన్నుల వొప్పు ముంగురుల పెనుఁగొప్పు చెలపచెమటచొప్పు చెలులాల చూడరే	॥ఈకాంత॥
మొగములోపలితీరు ముతైపు కుచ్చలపేరు సొగసుఁ బయ్యద జారు చొక్కమాయనే నగవు లోపలి సిగ్గు నవకపు మేని నిగ్గు మగువ మొక్కుల తగ్గు మంచిదే కదరే	॥ఈకాంత॥
కడుసింగారాలసొంపు కందువమాఁటల యింపు నడపులలోని జంపు నయమేకదే యెడయక శ్రీవేంకటేశుఁ డిట్టె యీకెఁ గూడె విడువని రతిపెంపు వేడుకలై మించెనే	॥ఈకాంత॥