ఆంధ్రభారతి - తాళ్లపాక అన్నమాచార్య కీర్తనలు - కంటిలేవే చెలియా కతకారి నీ చేఁతలు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1965-5
సంపుటము: 29-329

తాళ్లపాక అన్నమాచార్య

రాగము: కాంబోది

కంటిలేవే చెలియా కతకారి నీ చేఁతలు దంటతనమున నింకా తారుకాణించనేలే	॥పల్లవి॥
కళలు మోమునఁ దేరె కన్నులఁ గెంజాయ మించె తలకూడెఁ బను లింకఁ దాఁచనేఁటికే పిలువఁ బోతివి నీవు ప్రియుఁడు నిన్నింతసేసె వలపు పట్టరానిది వట్టిమాఁట లేఁటికే	॥కంటి॥
వాసనలు మేన నిండె వడియఁ జొచ్చెఁ జెమట సేసిన చేఁతలు చెల్లె సిగ్గు లేఁటికే నా సుద్దులు చెప్పితివి నడుముఁదాఁ బెండ్లాడె ఆసలు కొండలవంటి వాతఁ డేమిసేసునే	॥కంటి॥
చిన్నలు చెక్కుల నిండె సెలవి నవ్వులు రేఁగె పన్నుగడ లొక్కటాయ బయమేఁటికే యిన్నిటా శ్రీవేంకటేశుఁ డీడకు వచ్చి నన్నేలె చిన్నపాయ మింత సేసె చెప్పవలెనటవే	॥కంటి॥