ఆంధ్రభారతి - తాళ్లపాక అన్నమాచార్య కీర్తనలు - ఇవివో నీ కాంత సుద్దు లేమని చెప్పేమిఁక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1967-3
సంపుటము: 29-339

తాళ్లపాక అన్నమాచార్య

రాగము: శంకరాభరణం

ఇవివో నీ కాంత సుద్దు లేమని చెప్పేమిఁక జవళి నీవూఁ గూడితే సంతోసాలయ్యీని	॥పల్లవి॥
వుడివోనితమితోడ నుమ్మగిలీ జవరాలు వొడలి చెమటలతో నోలలాడీని చిడుముడి కోరికల చిత్తమెల్లాఁ జంచలించి అడరి నిట్టూర్పుల నుయ్యాల లూఁగీని	॥ఇవి॥
విరహపు వేదనల వీడు దోడాడుకొంటాను సరి నెదురుచూపుల జాజరాడీని మరగిన మమతలు మక్కళించి మక్కళించి తురుము వీడి చీఁకటిఁ దులఁదూఁగీని	॥ఇవి॥
చెలులతో నీ సుద్దులు చెప్పి చెప్పి పులకల వలపుల రతులకు వంతులాడీని యెలమి శ్రీవేంకటేశ యింతలో నిన్నుఁ బెండ్లాడి మొలక నవ్వు లెల్లాను ముప్పిరి వేసీని	॥ఇవి॥