ఆంధ్రభారతి - తాళ్లపాక అన్నమాచార్య కీర్తనలు - ఇంకనేల సిగ్గువడే విద్దరు నున్నా రీడను - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1970-5
సంపుటము: 29-359

తాళ్లపాక అన్నమాచార్య

రాగము: బౌళి

ఇంకనేల సిగ్గువడే విద్దరు నున్నా రీడను కొంకక నన్ను మన్నించి కూడితివి నాఁడే	॥పల్లవి॥
కంకణాలచేత నాపె కానుక లిచ్చీ నీకు అంకెలఁ బరాకుమాని అందుకోవయ్యా సంకెలేల నీముందర చక్కఁగా నిలుచున్నది పంకించక నీ మోము చూపఁగదవయ్యా	॥ఇంక॥
మూరెఁడు దురుమువంచి మునుకొని మొక్కీ నీకు తేరకొనఁ జూచాకెను దీవించవయ్యా కూరిమి గొసరి నీ కొలువులు సేసీని సారెకును మెచ్చి మెచ్చి సంతోసించవయ్యా	॥ఇంక॥
వెలయ కప్రపు నోర విన్నపాలు సేసీ నీకు లలిఁ జెవ్వులారా విని లాలించవయ్యా అలమేల్మంగను నే నీ యాలను శ్రీవేంకటేశ వలచి వచ్చినాపెను వడిఁ జేకొనవయ్యా	॥ఇంక॥