ఆంధ్రభారతి - తాళ్లపాక అన్నమాచార్య కీర్తనలు - అరవిరి బాగుల యతివ నీ వవుదువే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1976-1
సంపుటము: 29-391

తాళ్లపాక అన్నమాచార్య

రాగము: నాదరామక్రియ

అరవిరి బాగుల యతివ నీ వవుదువే సొరిది నీ వొయ్యారాలు చూడఁ గొత్తలాయనే	॥పల్లవి॥
నిదుర కన్నులతోడి నివ్వెరగులు చెదరుఁ గురుల చిమ్మఁజీఁకటులు వెదచల్లు నవ్వులవెన్నెలలు తుదకెక్కి రది గఱుతులు నీ కొనరెనే	॥అర॥
పచ్చిదేరేటి చెక్కులపై చెమటలు ముచ్చటలాడుకొనేటి మోవివాడులు కొచ్చి కొచ్చి సొలసేటి కొనచూపులు అచ్చముగ నీమేని కన్నియు నమరెనే	॥అర॥
ముప్పిరి సమరతుల మోముకళలు కుప్పలుగా రాలేటి కొప్పువిరులు వొప్పి శ్రీవేంకటేశుఁ గూడున్న చొప్పులు యిప్పు డీ శింగారాలు యివి నీకే తగునే	॥అర॥