ఆంధ్రభారతి - తాళ్లపాక అన్నమాచార్య కీర్తనలు - మీ కిద్దరికిఁ దగవు మేము చెప్పేవారమా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1984-1
సంపుటము: 29-439

తాళ్లపాక అన్నమాచార్య

రాగము: వరాళి

మీ కిద్దరికిఁ దగవు మేము చెప్పేవారమా చేకొన్న మీ వూడిగము చెలులము నేము	॥పల్లవి॥
యింతులు పైకొంటేను యియ్యకొనవలెఁగాని యెంతైనాఁ బెనఁగరాదు యెప్పుడూ నీకు పంతము లాడుకొంటేను పై పై నవ్వవలెఁగాని వంతులకు మారుకొనవచ్చునా నీకు	॥మీకి॥
చనవున్నఁ గొసరితే సమ్మతించవలెఁగాని వెనక ముం దెంచరాదు వింతగా నీకు చెనకి కాఁగిలించితే చెలరేఁగవలెగాని మనసు సోదించరాదు మలసి నీకు	॥మీకి॥
మొక్కితేను పొందుసేసి మొగమోడవలెగాని వెక్కసించరాదు మరి వేరే నీకు ఇక్కడ శ్రీవేంకటేశ యీకె నిట్టె కూడితివి చొక్కి వినోదించవలె సొంపుతో నీకు	॥మీకి॥