ఆంధ్రభారతి - తాళ్లపాక అన్నమాచార్య కీర్తనలు - మఱి నీవే కరుణించి మన్నించితి వింతేకాక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1985-5
సంపుటము: 29-449

తాళ్లపాక అన్నమాచార్య

రాగము: కన్నడగౌళ

మఱి నీవే కరుణించి మన్నించితి వింతేకాక గుఱుతులు చెప్పి నిన్నుఁ గొసరఁగఁగలమా	॥పల్లవి॥
వెలఁది భావము నీకు విన్నవించితిమిగాక వలపులు గొనఁబెట్ట వసమా మాకు తలకొన్న నేస్తముల తగవు చెప్పేముగాక చెలరేఁగి తమి రేఁచఁ జెల్లునా మాకు	॥మఱి॥
తరుణి లోనన్నమాఁట తలఁపించితిమిగాక సరసము లాడించ సంగతే మాకు సరుస మీ కిద్దరికి సాకిరై వుండేముగాక సొరిది మీ గుట్టు చెప్పఁ జొప్పడునా మాకు	॥మఱి॥
యింతి జుట్టరికము నీ కెరిఁగించితిమిగాక వంతున సరి వెనఁగవచ్చునా మాకు యింతలో శ్రీవేంకటేశ యీకె నేలితివిగాక పొంత మిమ్ము సోదించఁబోలునా మాకు	॥మఱి॥