ఆంధ్రభారతి - తాళ్లపాక అన్నమాచార్య కీర్తనలు - విచ్చి చెప్ప నెట్టు వచ్చు విరహుల గరిమలు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1997-5
సంపుటము: 29-521

తాళ్లపాక అన్నమాచార్య

రాగము: భైరవి

విచ్చి చెప్ప నెట్టు వచ్చు విరహుల గరిమలు కచ్చు పెట్టి తమ్ముఁ దామె కలయుటఁ గాక	॥పల్లవి॥
పట్టరానిది వయసు పాయరానిది కూటమి నెట్టన దాఁచరానిది నిండు వలపు గుట్టు లేనిది నగవు గురి లేనిది మనసు యెట్టు వేగించఁగ వచ్చు నిఁక విరహులకు	॥విచ్చి॥
చెప్పఁగరానిది సిగ్గు చిక్కించరానిది బుద్ది తప్పించుకోరానిది తగులాయము తిప్పరానిది గుణము తెగరానిది మమత అప్పటి నెట్టోర్వవచ్చునమ్మ విరహులకు	॥విచ్చి॥
పెంచరానిది యలుక బిగియరానిది పొందు కొంచించరానిది తలకొన్న ననుపు యెంచఁగ శ్రీవేంకటేశుఁ డీకె నిట్టె కూడెఁ గాక వంచించి యెట్టు గెలువవచ్చు విరహులకు	॥విచ్చి॥