ఆంధ్రభారతి - తాళ్లపాక అన్నమాచార్య కీర్తనలు - ఏడనుండి వచ్చితివే యీడకు నీవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 2001-4
సంపుటము: 29-544

తాళ్లపాక అన్నమాచార్య

రాగము: పాడి

ఏడనుండి వచ్చితివే యీడకు నీవు వాడిక సేసుక యేమి వద్దఁ గూచుండేవే	॥పల్లవి॥
పవ్వళించియున్నవాని పాటలు వాడి లేపి యివ్వల నూరకే యెంత యెలయించేవే దివ్వెలెత్తుఁ బొద్దుకాడ తెరలోననున్నవాని రవ్వఁగా బిలిచి చదరంగా లేమాడేవే	॥ఏడ॥
ఆకడి మోమైనవాని నట్టె చెక్కునొక్కి తీసి కాకరి మాఁటల నేమి కత చెప్పేవే నాకడనుండినవాని నవ్వు నవ్వి కొనగోర రేక దీసి తమి యెంత రేఁచవచ్చేవే	॥ఏడ॥
అలసియున్నవాని నట్టె కౌఁగిలించుకొని మలసి మోవిచ్చి యెంత మరిగించేవే యెలమి శ్రీవేంకటేశుఁ డిప్పు డిట్టె నన్నుఁగూడె వలపులు రేఁచి యేమి వావులు చెప్పేవే	॥ఏడ॥