ఏమి సేయుదునమ్మ యిన్నియును నిటుగూడె [2]తామసపుఁ బ్రేమ వేదనఁ బాయనీదు	॥ఏమి॥
కినిసి నే సొలసి పలికెద నంటినా యతని- నెనయుఁ దడఁబాటు నోరెత్తనీదు చెనకి యలపార[3] జూచెద నంటినా యతని- కనుఁగవ జలంబు సరుగునఁ జూడనీదు	॥ఏమి॥
కిందుపడి కదిసి మ్రొక్కెద నంటినా యతని- యంది (నంది?) పరవశము[4] చేయాడ నీదు డెందంబు మఱచి యుండెద నంటినా యతనిఁ జెందిన తఁలపు మఱచియు మఱవనీదు	॥ఏమి॥
తిరువేంకటేశుఁ బొందితినంటినా[5] యతని- దొరతనము నాగరిమ దోఁచనీదు సిరిదొలఁకు రతుల నలసితి[6] నంటినా యతని- సరసంబు వేడుకలఁ జాలించనీదు	॥ఏమి॥

---

(ఈ సంకీర్తన 5వ సంపుటంలో 113వ సంకీర్తనగా ఉంది.)

^[1] తా.వెం; తం.ప్ర. కాంబోది-ఝంపె తాళము
^[2] తా.వేం. నాతామస
^[3] తా.వేం. యెలవార
^[4] తం.ప్ర.అందినా పరవశత
^[5] తం.ప్ర; తా. వేం. గలసెద నంటినా
^[6] నలసెద నంటి