గందము వూసేవేలె కమ్మని మేన యీ గందము నీమేనితావికంటె నెక్కుడా	॥పల్లవి॥
అద్దము చూచేవేలే అప్పటప్పటికిని అద్దము నీమోముకంటె నపురూపమా ఒద్దిక తామరవిరినొత్తేవు కన్నులు నీ గద్దరికన్నులకంటె కమలము ఘనమా	॥గందము॥
బంగారు వెట్టేవేలే పడఁతి నీమెయినిండా బంగారు నీతనుకాంతి ప్రతివచ్చీనా ఉంగరాలేఁటికినే వొడికపువేళ్ల[1] వెంగలిమణులు నీ వేలిగోరఁ[2] బోలునా	॥గందము॥
సవర మేఁటికినే జడియు నీ నెరులకు సవరము నీకొప్పుసరి వచ్చీనా యివలఁ జవులు నీకునేలే వెంకటపతి సవరని కెమ్మోవిచవికంటేనా	॥గందము॥

---

(ఈ సంకీర్తన 5వ సంపుటంలో 2వ సంకీర్తనగా ఉంది.)

^[1] తా.వెం. లేఁటికే యువిదనీవేళ్లకు
^[2] నిడురేకు. గోరిబోలునా