ఆంధ్రభారతి - తాళ్లపాక అన్నమాచార్య కీర్తనలు - తలచి (పాసీ యుండ) - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 238 సంకీర్తన: 249
ప్రత్యేక సంపుటము - సంకీర్తన: 131

తాళ్లపాక అన్నమాచార్య

రాగము: భైరవి - అట

తలచి (పాసీ యుండ) రాదు - తలచకుండగ రాదు మదిలో తలపు తగులుగ జేసె గదవే - తరుణి యలమేల్మంగను	॥పల్లవి॥
కలికి కౌగిట బిగిసి ఆయము - కరగు నిమిషము పేరుకొనగా పిలిచి నే నొక మాట యడిగిన - పెదవి పెదవిని మోపుచున్‌ మొలకనవ్వుల పంటి మొనలను - మోవి నొక్కుచు మోడ్పుగన్నుల నలమి సిగ్గున మోము మోమున - నప్పళించే కలికిని	॥తలచి॥
అలక లటు నిటు చెదర నఖముల - నల్లనల్లన గూడ దువ్వుచు చెలువుడా బడలితివొ యని తన - చేత నా మెయి నిమురుచు అళులబోలెడు చూపులను నా - యాననాబ్జము నందె నిల్పుచు తళుకుగన్నుల హరుష జలములు - తొలకరించే కలికినీ	॥తలచి॥
చిలుకగోరున నాదు చెక్కిలి - జీరి ముద్దాడుచును చెవులలొ పలుకుచును తా బలుకరింపుచు - ప్రాణములు రెం డొకటియై మెలకువను రతికేళి వేళల - మెచ్చు లొసగుచు ప్రియము సేయుచు పలుకకుండిన ప్రేమమున నను - బలుకరించే చెలియను	॥తలచి॥
మొలకపులకల నాదు దేహము - కలయికల చిరుచెమట పట్టగ వలిపపయ్యెద చెరగు సురటిగ - వామకరమున విసరుచున్‌ చెలియ తన వలకేల నా మెయి - చెమట దుడుచుచు బుజ్జగింపుచు వలపు వాతెర తేనెలను నా - వాడుదేర్చు లతాంగినీ	॥తలచి॥
కులుకుగుబ్బల నాదు ఉరమున - గుచ్చి గోరాడుచు నదిమి పట్టగ మెలకువన తన జడను జుట్టుకు - మెదలకుండను బట్టుక పలుకురా యిక వేంకటేశ్వర - ప్రాణనాథుడ వనుచును నలసి యురముననుండి పలికే - యట్టి యలమేల్మంగను	॥తలచి॥