[1]దేవర వంటివాడని - తెలియనైతి [2]నిందాకా చేవదేర బుద్ధి చెప్పి - సేవ గొనవయ్యా	॥పల్లవి॥
మొన్న నా కాలు దాకితే - మ్రొక్కమరచి యుండితి (చెన్నుగా)[3] నీ వేళైనా మొక్కేను - చేరరావయ్యా నిన్నటి మా తమ్ములము - నీ చెక్కిలిపై నున్నది పన్నీటినైనా కడిగేను - బడినే రావయ్యా	॥దేవర॥
సారెకు నీవు రాగా మం-చము మీద నుండినట్టి నేరము (బాపుకొనే నే - డింటికి రావయ్యా) [4]వోరికొట్లు గొట్టితి - నుబ్బి జవ్వనమదాన[5] గారవించవలె నే - కాంతానాను రావయ్యా	॥దేవర॥
ఏనాటికి నీవే చన - వీయగ నెదకెక్కితి నేనాటదాన నీవే దయ - నేలుకొనగ రావయ్యా మానిత సద్గుణ నిధాన - మాధవ కృష్ణాయని ని న్నూనిన భక్తింగొల్చెద - నొద్దిక చేకొనుమయ్యా	॥దేవర॥
అలమేలుమంగనని - అట్టె నీ వురమెక్కితి యెలమితోఁ గౌఁగిలించే - నీడకు[6] రావయ్యా కలసి రతుల వేం - కటనాథ గెలిచితివి పలుదెరంగుల మోవి - పంతమిచ్చే రావయ్యా	॥దేవర॥

---

^[1] ఈ పాట వ్రాతప్రతిలో పునరుక్తమైనది (చూ. సంకీర్తన - 209) ఇదే పాట తంజావూరిప్రతిలో బిలహరిరాగమున నున్నది (సం.కీ. 86)
^[2] మిందాక (తా.సం.); నిందాక
^[3] తం.ప్ర.
^[4] వోరికొట్లు (తా.సం.), రాకొట్టుట వంటిదే ఓరిగొట్టు ప్రయోగము
^[5] జవ్వనముదాన (తం.ప్ర.)
^[6] యిటు (తా.సం.) ముద్రను బట్టి ఈ పాట చినతిరుమలాచార్యులవారిదిగా తోచును