అదివో [1]అల్లదివో హరివాసము [2]పదివేలు శేషుల పడగల మయము	॥అదివో॥
అదె వేంకటాచల [3]మఖిలవున్నతము అదివో బ్రహ్మాదుల కపురూపము అదివో నిత్యనివాస మఖిలమునులకు నదె చూడుఁ డదె మొక్కుఁ డానందమయము	॥అదివో॥
చెంగట నల్లదివో శేషాచలము నింగినున్న దేవతల నిజవాసము ముంగిట నల్లదివో మూలనున్న ధనము బంగారుశిఖరాల బహుబ్రహ్మమయము	॥అదివో॥
కైవల్యపదము వేంకటనగ మదివో శ్రీవేంకటపతికి సిరులైనది భావింప సకలసంపదరూప మదివో పావనములకెల్లఁ బావనమయము	॥అదివో॥

---

^[1] ‘అల్లదిహో’ పూ.ము.పా.

^[2] ‘పదివేల’ కావచ్చు.

^[3] ‘అఖిలోన్నతము’ పూ.ము.పా.