ఆంధ్రభారతి - తాళ్లపాక అన్నమాచార్య కీర్తనలు - పరము నిహము పంటవండినయట్టు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 150-3
సంపుటము: 2-231

తాళ్లపాక అన్నమాచార్య

రాగము: ముఖారి

పరము నిహము పంటవండినయట్టు యిరవుగాఁ దానే యెట్టయెదుట నున్నాఁడు	॥పల్లవి॥
ముంచిన మహిమలెల్లా మూర్తివంతమైనట్టు కాంచిన వరములు సాకారమైననట్టు అంచు శృంగారరసాన కంగములు వచ్చినట్టు యెంచఁగ శ్రీవేంకటేశు డెదుర నున్నాఁడు	॥పర॥
చెలఁగి అకాశానకు చైతన్యము వచ్చినట్టు అల దయాసింధువు ప్రత్యక్షమైనట్టు మొలచి సుజ్ఞానము మోసులెత్తి వుండినట్టు యెలమి శ్రీవేంకటేశుఁ డెదుట నున్నాఁడు	॥పర॥
పరగ నానందము ప్రతిబింబించినయట్టు సురలభాగ్యము పొడచూపినట్టు వురుటై యలమేల్మంగ నురమున నించుకొని యిరవై శ్రీవేంకటేశుఁ డెదుట నున్నాఁడు	॥పర॥