ఆంధ్రభారతి - తాళ్లపాక అన్నమాచార్య కీర్తనలు - త్రికరణశుద్ధిగా చేసిన పనులకు దేవుడు మెచ్చును లోకము మెచ్చును - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 151-2
సంపుటము: 2-236

తాళ్లపాక అన్నమాచార్య

రాగము: గుజ్జరి

త్రికరణశుద్ధిగా చేసిన పనులకు దేవుడు మెచ్చును లోకము మెచ్చును వొకటి కోటిగుణితంబగు మార్గములుండఁగఁ బ్రయాసపడనేలా	॥పల్లవి॥
తనమనసే పరిపూర్ణమైన గోదావరి గంగా కావేరి కనకబిందు యమునా గయాది ముఖ్యక్షేత్రంబుల సంతతమున్ దినకరసోమగ్రహణకాలముల తీర్థాచరణలు సేసిన ఫలములు తనుఁ దానే సిద్ధించును వూరకే దవ్వులు దిరుగఁగ మఱి యేలా	॥త్రిక॥
హరియను రెండక్షరములు నుడివిన నఖిలవేదములు మంత్రములు గరిమ ధర్మశాస్త్రపురాణాదులు క్రమమునఁ జదివిన పుణ్యములు పరమ తపోయోగంబులు మొదలగు బహుసాధనముల సారంబు పరిపక్వంబై ఫలియించంగా బట్టబయలు వెదకఁగనేలా	॥త్రిక॥
మొదల శ్రీవేంకటపతికినిఁ జేయెత్తి మొక్కిన మాత్రములోపలనే పదిలపు షోడశదానయాగములు పంచమహాయజ్ఞంబులును వదలక సాగంబులుగాఁ జేసినవాఁడే కాఁడా పలుమారు మదిమదినుండే కాయక్లేశము మాఁటికి మాఁటికి దనకేలా	॥త్రిక॥