ఆంధ్రభారతి - తాళ్లపాక అన్నమాచార్య కీర్తనలు - జీవుని కేకాలము శ్రీహరి చేరువబంధువుఁ డీతఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 179-1
సంపుటము: 2-392

తాళ్లపాక అన్నమాచార్య

రాగము: సాళంగనాట

జీవుని కేకాలము శ్రీహరి చేరువబంధువుఁ డీతఁడు భావములోపలి పెరరేఁపకుఁడై భక్తి చేకొనును యీతఁడు	॥పల్లవి॥
పరమున నిహమున వెంటవెంటనే పాయని బంధువుఁడీతఁడు ధరఁ దనుఁదలచిఁన మారుకు మారై తా రక్షించును యీతఁడు విరివిగ నింద్రియవిషయభోగముల విందులు వెట్టును యీతఁడు వురుగతిఁ జిత్రపురూపుల దేహపుటుడుగర లిచ్చును యీతఁడు	॥జీవు॥
వడిఁ గలకాలము యిరువదియొక్కటవావుల బంధువుఁడీతఁడు బడిబడిఁ జైతన్యంబై యిన్నిటఁ బనులకు నొదగును యీతఁడు జడిగొని యేకాంతలోకాంతమై మతిసంగతి నాప్తుఁడీతఁడు పొడలుచు వైదికలౌకికముల నొకపొత్తునఁ గుడుచును యీతడు	॥జీవు॥
ఘననిధినిక్షేపములిచ్చేటి వుపకారపుబంధువుఁ డీతఁడు అనయము వెరవకుమని యేకాలము నభయం బొసగును యీతఁడు ననిచిన శ్రీవేంకటేశ్వరుఁడై యిటు నాపాలఁగలుగు నీతఁడు పనివడి అరులను సూడువట్టి కడుఁ బగసాధించును యీతఁడు	॥జీవు॥