ఆంధ్రభారతి - తాళ్లపాక అన్నమాచార్య కీర్తనలు - ఇంతకంటేఁ దగుబంధు లింక నున్నారా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 180-4
సంపుటము: 2-400

తాళ్లపాక అన్నమాచార్య

రాగము: రామక్రియ

ఇంతకంటేఁ దగుబంధు లింక నున్నారా యెంత సేసినా నీకు నెదురాడేనా	॥పల్లవి॥
కోపగించి చంకబిడ్డఁ గోరీ తల్లి డించితేను పైపైనే పడుఁగాక పాసిపొయ్యినా వోపక నానేరముల కొగి నీవు వేసరితే నీపాదాలే గతిగాక నే మానేనా	॥ఇంత॥
చదివించే అయఁగారు జంకించి చూచితేను వొదిగి చదువుఁగాక వోపననీనా యెదుటి గుణములకు నెంత నీవు దొబ్బినాను యిదె నీకే మొక్కుదుఁగా కింక మానేనా	॥ఇంత॥
చెక్కు మీటి పాలు పెంచినదాది వోయఁగాను గక్కన మింగుటగాక కాదనీనా యిక్కడ శ్రీవేంకటేశ యిటుల రక్షించఁగ నిక్కి నే మెరతుఁగాక నే మానేనా	॥ఇంత॥