ఆంధ్రభారతి - తాళ్లపాక అన్నమాచార్య కీర్తనలు - చూచి మోహించకుందురా సురలైన నరులైన - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 181-1
సంపుటము: 2-403

తాళ్లపాక అన్నమాచార్య

రాగము: తెలుఁగుకాంబోది

చూచి మోహించకుందురా సురలైన నరులైన తాచి నీవు ముందరఁ బ్రత్యక్షమైనను	॥పల్లవి॥
భాగీరథి పుట్టిన పాదపద్మములు భోగపు మరుని జన్మభూమి నీ తొడలు యోగపు నవబ్రహ్మలుండిన నీ నాభి సాగరకన్యక లక్ష్మి సతమైన వురము	॥చూచి॥
అందరి రక్షించేటి అభయహస్తము కంద నసురులఁ జంపే గదాహస్తము సందడి లోకముల యాజ్ఞాచక్రహస్తము చెంది ధ్రువు నుతియించఁ జేయు శంఖహస్తము	॥చూచి॥
సకల వేదములుండే చక్కని నీ మోము వొకటై తులసిదేవి వుండేటి శిరసు ప్రకటపు మహిమలఁ బాయని నీ రూపము వెకలి శ్రీవేంకటాద్రి విభుఁడ నీ భావము	॥చూచి॥