ఆంధ్రభారతి - తూము నరసింహదాసు కీర్తనలు - రామ! నీవాడసుమీ - యిక నన్ను

గానం: శ్రీ ఆకొండి శ్రీనివాస రాజారావు, కాకినాడ.

పంతువరాళి - చాపు (హిందోళ)

పల్లవి:

రామ! నీవాడసుమీ - యిక నన్ను - బాముల బెట్టకుమీ!

అనుపల్లవి:

రామ! నీవాడనై యేమని భువిలోన -
సామాన్యులతో నేనేమి దెల్పుకొందు!

చరణము(లు):

దిక్కు నీవె యంటిని - నా మదిలోన - మ్రొక్కి వేడుచుంటిని
ఒక్కసారైన నీచక్కనిమోము నా -
దిక్కుజూపవిది యెక్కడి చిత్రమొ

ఒరుల వేడనంటిని - నీ పాదముల - మఱువనే యంటిని
గరుడగమన మీకరుణ రావలెగాక -
మఱచియుండిన నాతరమా యాదివేల్ప

శక్తివంచన లేదుగా - నీ పైని యా - సక్తి తోడుత నుంటిగా
యుక్తినిజేసి నీభక్తులతోపాటు -
ముక్తిగతునిగా గానవ్యక్తుని జేయక

తిరము గాదు దేహము - వీడుటకునై - తరము గాదు మోహము
గురుతరశల్య సంగత మయిన దీనికై -
ముఱియుచు భక్తుల తెఱగు దెలియనైతి

మొర విన వేమిసేతు - నీ సంసార - భరము నే నెటుల ద్రోతు
గరిమతోడ తూము నరసింహుడను భక్త -
వరునితోడను నేమరకుండు రఘురామ